Հայաստանում թմրամոլները շատացել են

Հայաստանում մոտավոր հաշվարկներով կա 30 հազար թմրամոլ, որից 7 հազարը թմրամիջոցները ներերակային ճանապարհով է օգտագործում։ Իսկ պաշտոնական վիճակագրությամբ՝ այս տարվա հունվարին Հայաստանում թմրամոլների թիվը կազմել է 1717։ Այս տարվա 10 ամիսների տվյալներով՝ թմրամոլների պաշտոնական թիվն ավելացել է շուրջ 300–ով։

Այս մասին այսօր լրագրողների հետ հանդիպման ժամանակ տեղեկացրեց ՀՀ առողջապահության նախարարության հոգեբուժական բժշկական կենտրոնի նարկոլոգիական կլինիկայի ղեկավար Պետրոս Սեմերջյանը։ Ըստ նրա՝ երկրում թմրամոլների թվի աճը պայմանավորված է սոցիալ–տնտեսական պայմանների բարելավմամբ։

«Տարեցտարի երկրի վիճակը լավանում է, և Հայաստանը նմանվում է մյուս զարգացած երկրներին»,– ասաց նա։

ՀՀ ոստիկանության թմրամիջոցների ապօրինի շրջանառության և թրաֆիքինգի դեմ պայքարի վարչության պետ Նազարեթ Մնացականյանի ներկայացրած տեղեկատվության համաձայն՝ այս տարվա ինն ամիսներին իրավապահները հայտնաբերել են թմրանյութերի ապօրինի շրջանառության, թմրանյութերի օգտագործման 1152 դեպք՝ նախորդ տարվա 826-ի դիմաց։ Քրեական պատասխանատվության է ենթարկվել 605 մարդ։

Ըստ ոստիկանության պաշտոնյայի՝ ուրախալին այն է, որ այս տարի ավելի շատ թմրանյութ իրացնողներ են հայտնաբերվել, քան այն ձեռք բերողներ ու օգտագործողներ։ «Սա լավ աշխատանքի արդյունք է»,– արձանագրեց նա։

2001 թ.–ի համեմատ այսօր Հայաստանում թմրամոլների թիվն ու թմրամիջոցների ապօրինի շրջանառության դեպքերն ավելացել են երեք անգամ։ Սա, ըստ մասնագետի, նաև ոստիկանության ավելի հետևողական աշխատանքով է պայմանավորոված։

Արդեն հաստատվել է Թմրամիջոցների դեմ պայքարի ազգային ծրագիր, որի շնորհիվ ավելի ակտիվ պայքար կմղվի այս արատավոր երևույթի դեմ։

Հարցեր, պատասխաններ, մեկնաբանություններ